आईसीसी वर्ल्ड क्रिकेट लिग डिभिजन(३ जितेर फर्केको नेपाली टिमका कप्तान पारस खड्काले बुधबारको भव्य सम्मानपछि क्रिकेटले देशलाई राष्ट्रिय एकतामा बाँध्ने बताउँदै सरकारलाई प्रशासनिक पक्षबाट सहयोग गर्न आग्रह गरेका छन् । यहाँसम्मको यात्रामा खेलाडीले धेरै मिहिनेत गरेका छन्, पारसले भने, अब नेपाली क्रिकेटलाई थप उचाइमा पुर्याउन सरकार र प्रशासन पक्षको पालो आएको छ । सम्मानपछि पारसले जीवनकै सबैभन्दा खुसीको दिन रहेको बताए ।
३० घन्टाको निन्द्रालाई थाँति राख्दै खेलाडी दर्शकको अपेक्षाअनुसार अटोग्राफ दिनमा व्यस्त रहे । कसैले हात, कसैले पैसाको नोट र कसैले कागजमा अटोग्राफ लिए । युवा तथा खेलकुद मन्त्रालय र राखेपले संयुक्त गरेको सम्मान कार्यक्रम करिब एक घन्टा चलेको थियो । खेलकुद मन्त्री रामकुमार श्रेष्ठले मूलपानीको मैदान छिट्टै बन्ने बताए । तेक्वान्दो खेलाडी दीपक विष्टले राष्ट्रका नायकहरूले ट्रफी जितेर देशलाई गौरवान्वित पारेको बताए । राखेप सदस्य सचिव युवराज लामाले मूलपानीमा ३० हजार क्षमता रहेको रंगशाला बनाउनुपर्ने जानकारी दिए । सिंहदरबारमा तीन बजे मन्त्रिपरिषद्का अध्यक्ष खिलराज रेग्मी, मुख्यसचिव लीलामणि पौडेलले सम्मान गरेका थिए । अध्यक्ष रेग्मीले क्रिकेटमा अहिलेसम्मकै ठूलो सफलता मिलेको बताउँदै टिमका हरेक सदस्यलाई ३ लाख ५० हजार रुपैयाँ दिने घोषणा गरे । उनले क्रिकेट व्यावसायिक हुनुपर्ने बताए । उनले भने, राखेप र क्यानले आवश्यक योजना बनाएर सरकारलाई पेस गर्नु पर्छ । त्यसलाई सरकारले सहयोग गर्नेछ ।
पेरिसडाँडामा सम्मान
एनेकपा माओवादीले पनि बुधबार साँझ टिमलाई नगदसहित सम्मान गर्यो । पार्टी मुख्यालय पेरिसडाँडामा अध्यक्ष पुष्पकमल दाहाल, उपाध्यक्षद्वय बाबुराम भट्टराई र नारायणकाजी श्रेष्ठले सम्मान गरे । १९ सदस्यीय टिमलाई नै जनही २५-२५ हजार रुपैयाँका दरले सम्मान गरेको हो । पारसले सबैको लक्ष्य नेपालले वल्र्डकप खेलेको हेर्ने रहेको बताउँदै त्यसका लागि सहयोग गर्न आग्रह गरे । दाहालले पूर्वाधार बनाउनका लागि सरकारसँग पहल गर्ने वाचा गरे । क्यानले राष्ट्रिय टिमलाई निकट भविष्यमा सम्मान गर्ने भएको छ । एक पदाधिकारीका अनुसार क्यानले हरेक खेलाडीलाई एक-एक लाख रुपैयाँ दिने तयारी गरेको छ ।
No comments:
Post a Comment